Si mutit ''A in antis in sardu! Sa limba in s' amministratzione pùblica'', s' isportellu subracomunale chi unit sos comunos de Fonne (capufila), Orgòsolo e Orane.
Finantziadu de sa lege regionale 22/2018 e de sa lege istatale 482/99, at a èssere gestidu e coordinadu dae sa sotziedade de servìtzios culturales Suìa.
S'isportellu linguìsticu at a èssere abertu una die a sa chida in cadaunu de sos comunos agregados e s'at a ocupare de tradutzione in sardu de sos atos in essida de sos entes comunales, de animatzione territoriale, de assistèntzia ortogràfica e consulèntzia linguìstica pro sas iscolas, assòtzios e de chie nde facat rechesta.
In prus de s' atividade de s' isportellu, su progetu previdet una parte dedicada a sa formatzione linguìstica, est a nàrrere tres cursos de trinta oras cadaunu cun sa finalidade de isvilupare sa difusione de su sardu chin s' impreu de sos diversos
registros de iscritura, sos còdighes comunicativos de s' economia comunitària e sas tècnicas de sa traditzione poètica. At a èssere possìbile sighire sos cursos siat in presèntzia siat in lìnia. Sos primos duos cursos, unu dedicadu a sas règulas
ortogràficas de su sardu e s'ateru a sa comunicatzione in limba sarda pro sas aziendas, s'ant a fàghere in Fonne, mentras su de tres, dedicadu a sa poesia improvisada e a su càntu a tenore, s' at a fàghere in Orgòsolo.
In prus est prevìdida sa realizatzione de s' atividade culturale a tìtulu ''Su teatru in limba sarda'', dedicada a sos ersonàgios importantes de Orane, comente a Costantino Nivola (iscultore), Mario Delitala (pintore), Marianna Bussalai (iscritora e poetissa) e Piero Borrotzu (partigianu), chi at a interessare sos picinneddos de s' iscola de s'infàntzia de Orane.
